پی ٹی آئی کو جلد اپنا مستقبل پتہ چل جائیگا‘ 9مئی کے کرداروں کے خلاف آفیشل سیکریٹ،ملٹری ایکٹ کے تحت مقدمہ درج ہوں گے ،جو کام بھارت،دہشت گرد نہیں کر سکے وہ چند شرپسندوں نے کر دکھایا‘ چوہدری سرور، شافع حسین کا شرکاء سے خطاب ،پاک فوج کے حق میں مسلم لیگ ہاؤس سے پریس کلب تک ریلی، شرکاء کی جانب سے فوج کے حق میں بھرپور نعرے بازی
لاہور (اسپیشل رپورٹر) پاکستان مسلم لیگ کے سربراہ و سابق وزیر اعظم چودھری شجاعت حسین نے کہا ہے کہ ایک شخص لیڈر بنتا ہے اور لوگوں کو توڑ پھوڑ کے لئے اکساتا ہے، آرمی تنصیبات پر حملے کرنے والوں کے خلاف سخت کارروائی ہونی چاہیے، 9مئی کے کرداروں کے خلاف آفیشل سیکریٹ اور ملٹری ایکٹ کے تحت مقدمہ درج ہوں گے،الیکشن ہوں یا نہ ہوں پی ٹی آئی کو اپنا مستقبل بہت جلد پتہ چل جائے گا اور عوام خود ہی اس جماعت پر پابندی لگا دیں گے۔ان خیالات کا اظہار انہوں نے گزشتہ روز پاک فوج سے اظہار یکجہتی کے لئے مسلم لیگ ہاؤس سے لاہور پریس کلب تک نکالی گئی ریلی کے موقع پر میڈیا سے گفتگو کرتے ہوئے کیا۔ چیف ارگنائز چودھری محمد سرور اور جنرل سیکرٹری پنجاب چودھری شافع حسین نے بھی ریلی کے شرکاء سے خطاب کیا۔شجاعت حسین نے کہا کہ جنرل عاصم منیر پاک فوج کے سپہ سالار ہیں جو بھی ان کے خلاف بات کرے گا وہ ملک کے خلاف بات کرے گا، 75سال میں پہلا موقع ہے جو کچھ انہوں نے کرنے کی کوشش کی، آج جو ریلی نکالی گئی وہ کسی ایک جماعت کی نہیں، آج کسی سیاسی پارٹی کانہیں بلکہ ملکی بقا کا مسئلہ ہے اس پر سب جماعتیں ایک ہو جائیں۔ انہوں نے کہا کہ یہ لوگ اپنے سیاسی چمکانے کے لئے جلسے کررہے ہیں لیکن یہ کامیاب نہیں ہوں گے، 9مئی کو اداروں پر حملے کرنے والوں کے خلاف آفیشل سیکریٹ اور ملٹری ایکٹ کے تحت مقدمہ درج ہوں گے۔ انہوں نے کہا کہ ایک شخص لیڈر بنتا ہے اور لوگوں کو اکساتا ہے کہ آپ توڑ پھوڑ کریں، جو بھی پاکستان کے خلاف بات کرے گا اس کو اس کی سزا مل جائے گی۔شجاعت حسین نے کہا کہ ہمارا پہلے دن سے موقف ہے کہ پاکستان میں سب جگہ ایک ہی وقت الیکشن ہونے چاہئیں، الیکشن ہوں یا نہ ہوں پی ٹی آئی کو اپنا مستقبل بہت جلد پتہ چل جائے گااور عوام خود ہی پی ٹی آئی پر پابندی لگا دیں گے۔ انہوں کہا کہ وہ اپنی ہی جماعت کو پروموٹ کر کے الیکشن لڑے گی، کوشش تھی تمام پی ڈی ایم ایک پلیٹ فارم سے ملکر الیکشن لڑتی لیکن اس بات پر اتفاق نہیں ہو سکا۔چوہدری سرور نے شرکاء سے خطاب کرتے ہوئے کہا کہ جو کام بھارت اور دہشت گرد نہیں کر سکے وہ چند شرپسندوں نے کر دکھایا، اس سے سب کے سر شرم سے جھک گئے ہیں، ان شرپسندوں کے خلاف کارروائی ہونی چاہئے۔چودھری شافع حسین کا کہنا تھا کہ نو مئی کو جو کچھ ہوا وہ پاکستان کی تاریخ میں کبھی نہیں ہوا، جو شخص حقیقی ازادی کی بات کرتا ہے، اسے کہنا چاہتا ہوں کہ حقیقی آزادی چودہ آگست کو ہی مل گئی تھی۔ریلی کے شرکا نے فوج کے حق میں نعرے لکھے پوسٹرز اور بینرز اٹھا رکھے تھے، اور وہ فوج کے حق میں نعرے بازی بھی کر رہے تھے۔
